سفيان صلاح هلال - في الحاجة إلى رمز

أحيانا الناس بتكون محتاجة رمز ، في الطب زي الدكتور مشالي أو مجدي يعقوب أو مجاهد.. في الجيش زي المنسي وعبد المنعم رياض وعبد العاطي صائد الدبابات، في التاريخ زي سعد زغلول، وجمال عبد الناصر .. في الدين والأساطير .. مين ما بيحبش يوسف الصديق وايوب والمسيح والنبي محمد ؟ عليهم السلام جميعا. وفعلا حاليا اسعار الدكاترة غالية في ملوي دكتور مسالك كشفه واعادته 300 جنيه داغير انه بيطلب تحاليل وأشعة غالية في كل زيارة.. بيركب الكسترة -اللي ممكن اي حد يركبها -ب150 جنيه غير الكشف .. أكتر من دكتور مخ وأعصاب نفس القصة .. أقل جراحة حاليا عند أفقر طبيب تتكلف من 3/4 الاف جنيه ده فيه كمان كارثة ، أنا نفسي مريت بها البعض بيقبض في العيادة وبيعمل العمليات في القسم الخاص بالمستشفيات الجامعية بحجة الأجهزة والحقيقة اننا بنضطر لإن لو رحنا من برة عقبال ما ييجي الدور إن جه ممكن المرض يعجز أو يموت في بعض الجراحات اللي عامل الوقت فيها مهم زي الشبكية والنخاع الشوكي وما شابه واحنا ناس فقرا فقرا فعلا ما يغركش ان لينا صفحات ع الفيس وبعضنا بيكتب واللا يرسم واللا واللا ..... أنا شخصيا في أحيان كتير بالجأ للصيدلي وأذكر بالخير الدكتور محمد عامر فرغلي اللي مات وهو كشفه جنيه وكان من أمهر الأطباء وكان احيانا والله يعمل عمليات مجانا دا كله والدكاترة عارفين إن المستشفيات مش بتقدم خدمات والناس مضطرة تروح لهم ... فلازم الناس تصدق ما تلاقي رمز تقول من خلاله للباقيين انتم مفتريين علينا ؟؟ الناس تعبااااااااانة فعلا ما يغركش ان العيادات مليانة عيانين دا غصب عنهم وكتير منهم مستلف أو حد حس بيه اداله وفال له روح اكشف .. وبعدين اي دكتور لو متوسط كشفه 50 جنيه حيحقق طموحاته و50 اجر معقول لمستوى الشعب ولو 50 × 20 كشف = 1000 جنيه يوميا مش هيحققوا طموح مواطن يبقى اللي زيي اللي دخله اصلا 1000 جنيه في الشهر وممكن ما تجيش ينتحر وربنا مش هيحاسبه! حجة ان الدكاترة محتاجين يصرفوا ع العلم الدكااترة بيتعلموا مجانا في الكليات زي كل الناس بضرايب الشعب
كل التخصصات والمهن بتصرف على شغلها وهواياتها هل تعلم ان النجار مثلا 40% من دخله لصيانة العدة وتجديدها وتجهيزها.. هل تعلم ان الحداد بيدفع كهربا او تمن فحم بأكتر من نص مصنعيته .. هل تعلم ان الأديب بشتري دوريات وأصدارات بأضعاف ما بياخده من مكافآت إن خد! لكن الإيمان بقيمة ما تعمله هو اللي بيخلي المقابل ما لوش معنى غير الستر
احنا طبعا مش ضد ان الناس تقضي مصالحها من شغلها أو تغني من شغلها بس بالمعقول والواقع، لكن نظرة التميز عند حد على كل خلق الله نظرة فيها كتير من نفخ الشيطان وربنا يعيذنا من همزات الشياطين
وختاما يا ريت فعلا يكون الدكاترة بيقروا ويحدثوا معلوماتهم مش بيحدثوا طلاء العيادات والسيارات والمريض بعد ما يموت ييجي واحد يقول: اصل للأسف كل التشخيصات كانت غلط ربنا يرحمه مكتوب له كده