شيماء الصباغ - أنا البنت الممنوعة من حضور حصص الدين المسيحي

فاتني مافاتنيش برضه هركبه
أنا البنت الممنوعة من حضور
حصص الدين المسيحي،
وقداس الحد،
مع إني شاهدة
على صلب يسوع
في محطة مصر في عزّ الصبح،
حتى ساعتها
كانت كل الشبابيك مفتوحة
والدم بيسابق العربيات على الأسفلت
وعيون البنات تجري في السماء
وتلحق كرسي الهزاز الممنوع،
وأنا البنت الممنوعة من الحب في الميادين،
وقفت في نص الشارع
لميت في أيدي كل نجوم السما
فرط وعرق البياعين،
صوت الشحاتين،
وأحباب الله
وهم بيلعنوا أبواللحظة
اللي وافق فيها خلق الله
على صلب يسوع عريان في الميدان
الزحمة على عقارب ساعة المحطة
وهي بتعلن واحدة الظهر،
وأنا البنت الممنوعة من قولة لأ
عمري ما هايفوتني الفجر».