نادية عيلبوني - لما يكون عقل المتعصب قد كس العقربة!

المد الديني السلفي، مش بس اثر على مجتمعاتنا وخلى عقولها بحجم عقل الدبانة ، بل ساهم ويساهم في صناعة تعصب ديني مضاد، وعقول اصغر، يظهر ذلك جليا لدى بعض القنوات التي يدعي اصحابها انهم يدافعون عن المسيحية والمسيحيين ،ولكن في مواجهة من؟ في مواجهة الاسلام والمسلمين كافة، هاي الارطة مش بس بتزيد طين التعصب الموجود بلة، لما بتحكي بمنطق شوفوا ديننا ما احسنه وما ارقه، وانتوا شوفوا دينكم ما اعطله ،الانكى من هيك ، لما تيجي وحدة متل ماغي خزام وتتنطح بالامور السياسية وهي مش عارفة ربها وين حاططها ، ويطلع معها ان الشعب الفلسطيني هو المعتدي وهو يلي احتل فلسطين وليس له حق بوطنه، من باب ان الله في العهد القديم، هو الذي وعد اليهود بفلسطين لأنهم سمعوا كلامه واطاعوه!!!!??? وانها كل الارض ارض الله، وهو حر يعطيها لمين ما بده! وهو اعطاها لليهود هذا على الاقل ما تفتق عنه عقل الكندرة ، وطبعا هي من كتر ما هي جاهلة ،مش مستعدة تبحث لتعرف ان فلسطين فيها كمان مسيحيين، وبتعرضوا للعدوان على وجودهم وبيوتهم متلهم متل المسلمين، من قبل اسرائيل، المهم نازلة علينا على ابو جنب وطرف. انو هدول الفلسطينية بستاهلوا يلي بتعمله اسرائيل فيهم كونهم مسلمين متعصبين ، ولازم يخلوا بيوتهم ويعطوها لليهود لأنو الله بقول هاي ارض الميعاد تبعهم؟
وطبعا الست ماغي،ما حكتلنا مثلا،وين يروحوا الفلسطينية بعد ما يسلموا بيوتهم للناس يلي الله وعدهم فيها الله ؟وين بتقترح يرموهم ؟ وما حكتلنا ، إنو شو بالنسبة لمسيحية فلسطين ؟ كمان هدول لازم يخلوا بيوتهم ويسلموها لشعب الله المختار وياخدوا اليهود بيوتهم واراضيهم؟ اه، تذكرت، هي ما عندها اي فكرة انو في مسيحية بفلسطين، وبجوز بتفكر انو المسيح مش من مواليد بيت لحم الفلسطينية ، وأنه من مواليد استكهولم، أو واشنطن، وانه كان يبشر برسالته بشوارع نيويورك!
يعني كل الشرور سببها المسلمين يلي بفلسطين ، هني يلي عم يعتدوا على اليهود يا حرام!
يالله، منيح لحد هون ، وطلعت شوي عادلة ، وما اتهمت الفلسطينية المسلمين بصلب المسيح!
معلش اسمحولي اصغر عقلي لمرة واحدة انا كمان، واخبر الست ماغي، اذا المسألة برأيك هي تعصب ديني عند المسلمين الفلسطينية وهني يلي عم يعتدوا على الحقوق الدينية لليهود ،فلازم اذكرك ، انو مش بس الإسلام كان متعصب ومتفرد بانتقاد كهنة اليهود، ورؤساء مجامعهم ،وكمان المسيح ما قصر فيهم ، اليس هو من وصف كهنتهم ورؤساء مجامعهم بالمرائين ؟ اليس هو من اطلق على كهنتهم تسمية اولاد الافاعي؟ اليس هو من وصف الاكليروس اليهودي بالقبور المبيضة من الخارج بينما في الداخل مملوئين نجاسة ؟ اليس هو من دعا على القدس بالدمار وعلى اهلها بالتشريد ؟ فخليها تنتقده وتقول عليه عنصري ومتعصب وتطالب بمحاكمته، باعتباره كان متعصبا ومحرضا ويثير الفتن الطائفية من خلال اتتقاده لكهنة اليهود؟
ملاحظة اخيرة للست ماغي، ومعها المدعو رشيد يلي عنده قناة بتحكي متل ماغي، بس هيك من باب ذكر ان نفعت الذكرى، انه ما حدا فظع باليهود أد ما فظعوا فيهم مسيحية اوربا، وما صارت ببلادنا إنهم اليهود تعرضوا للإبادة والتهجير زي ما عملت فيهم اسبانيا الكاثوليكية ، وما صار ،ابدا انو حدا فكر يحرق اليهود بأفران الغاز متل ما عملوا المسيحيين الالمان، وانهم كلهم هدول ، ومشان يكفروا عن جرايمهم يلي عملوها باليهود، ساهموا بتهجيرهم الى فلسطين ، وساعدوهم ليعملوا فيها وطني قومي لهم بعيدا عنهم ، ومن كيس غيرهم، وعلى حساب شعب فلسطين، الذي لا دخل له بمذابح اليهود، لا من قريب، ولا من بعيد ، منيح هيك او ازيد؟