د. أبو الحسن سلام - شرق البلد

شرق البلد
مع البنات وصلنا للبحر الكبير
لبنته يملوا البلاليص
طفلن صغير عشر سنبن
في زمن رخيص
بملمين شقة رغيف طعمية
والتاني فيها مدمس
أو صحن نابت
تسقي ولا تغمس
بمليمبن تركب مراجيح
وتصاحب الريح
تقضي يومك في التفاريح
تركب سطوح البيت وتصيح
أنا مين قدي !!
بمليمبن يومك يعدي
الصبح فول والليل حلاوة طحنية
أما الغدا..
فالشيلة شيلة المدرسة
صحن فول وجبنة شستر
خرطه واحده لكل واد تلميذ
مفيش تمييز
كان البلح إبريمي جاي من قبلي
أسواني لزوم التحليه
الكل واحد
---
جرجس كان إسمك ولا عبد الواحد
ريحي في ريح الواد ملاك
الله يجازيه
مش مسامحه علي مخازيه
كنا صحاب
علي تخته واحده كنا صان فا صو
له في التجارة
ان طال يجوز كان ياع أبوه
بضاعه ما ادرك إيه ..
متخزنة في الدرج
حاطط له رزه وقفل الفلق
كد قفل باب صندوق مرت أبوي
الله يرحمها.
---
في صبح يوم أسود مالوش قمر ولا شمش
صراخ ملاك كان يسمعوه الطرش :
بضاعتي.. دكاني
سرقوني آه ياني
القفل كان مفشوش
مين ياملاك فشه ؟!
تتهم مين ياملاك؟!
يبص لي
شيطانه علي طول اتهمني
يخرب مطنك .. بيت أبوك
تظلمني ليه
ربك وكيل التهمة زور التهمه زور
والناظر تور
تبع كلام عيل موتور
حتكلم مين ؟!
---
في الفسحة عبطًوني
وتلامذه زفوني
ظلومه والله ظلومه
يا خلق .. صدقوني
لكن تكلم مين
علي كل ودن من ودان الناظر
قفل مش ظاهر
---
ستين سنه فاتت علي عملة ملاك
مقدرتش أنساها ولا أنسي البنات
والرغي عند البحر حوالين الجواز
مش مكسوفين
كأن مش ماشيين وفيه راجل !
راجل وعمره عشر سنيين . .
غصبن عن الكل الكليلة
مشت البنته مع البلاليص فاضية وملبانه
جميله ريح جميله ونا وراهم
هالا هالله ما أحلاهم
لا وإيه ..
كنت راجل كل بنوته
في الروحه والجايه
عنيا ما فارقت وحده من البناويت
في الروحه و الجايه
عود سيسبان وربح خفيف هزه
يميل شمال ريح م اليمين لزه
مش مشي ده
دا رقص
في ريحكم راجل
اختشوا ده نقص
بس ايه .. كده وكده !!
ااااه يا دنيا ياحلاوة الرقص
لما راجل سنه عشر سنين
ورا البنات يمشي
---
مانستش واصل لا البنات ولا ملاك
ولا وشوشة بنوته والتانية بسرها للبحر..
ولد مين دا اللي يملي عنيها
ولا واحده تستحي وتقول معانا راجل
آه من البنات وآه من الزمن الرخيص
ومن مشيك ورا بنات يترقصوا ببلاليص
وآه وآه من كل ما يشبه ملاك
وهو خسيس

د. أبو الحسن سلام