خالد جهاد - تحت الأنقاض

-كمال... حبيبي.. أعطيني ايدك.. مش قادرة أشوفك بهالعتمة..

-خايفة؟

- لأ.. اول مرة أحس إني مش خايفة.. حياتي كلها كانت خوف.. بس ما بدي احس اني لحالي.. زي ما أنا هلأ..

- انتي منيحة؟

- تعبانة شوي.. بس بتمرق.. انت كيفك؟ احكيلي.. ليش ما بتحكي؟ سامعة الناس من حوالينا.. بعاد على قد ما هما قريبين..

- أنا منيح.. صوتك برجف.. بردانة؟

- شوي.. كلها اكم ساعة وبتطلع الشمس.. اكيد حييجوا يساعدونا.. بس المشكلة إنه ما معي ساعة وما بعرفش إحنا بأي ساعة.. مش شايفة اشي.. ومش حاسة بإشي.. أعطيني ايدك يا كمال.. حاول.. وأنا حجرب أوصلك.. حعرفك من ساعتك..

- ياريت يا هند ياريت..

- ماتخافش أنا بمدلك ايدي وانت ناولني ايدك..

- أنا خايف عليكي لأني مش شايفك..

- بس أنا حاسة فيك.. بدور على أصابيعك..

- يا هند صعبة توصلي..

- الله بيعين.. وين صوتك؟.. وين ايدك؟

- ما بعرف؟

- لقيتك.. ليش ايدك باردة.. باردة كتير..

- ايدي مش حاسس فيها..

- كمال.. كمال.. وينك.. هاي ايدك.. انت وين.. وين.. وين..








- حبيبي.. صباح الخير.. وين احنا؟

- ما بعرف.. بس المكان حلو كتير.. كتير.. وانتي أحلى.. اعطيني ايدك..

- كمال.. وين احنا.. هاي مش غزة؟
وين احنا..



خالد جهاد..