قصيدة "الزمارة " للشاعر عبدالرحمان الكافي

هي مزمّرة و زادولها زمَّاره ...
لا فايدة لا منفعة لا ضماره ...
الوقت مزمّر ...
الشرّ خلط على ذرعانه شمّر . .
الناس تشكي من الغلاء تتذمّر ...
والفقري صايرة عيشتو مرّاره
يا من جيت باش تعمّر ...
دزّتك ماهي شبوب عماره ...
الأمة حـــــــــــارت ...
الأسعار في يومين طارت ...
علينا يا رفيقي جارت ...
بياع الخضرة عاند الجزاره ...
على بعضها العباد راهي غارت ...
سبب الهم حريّة التجاره ...
زمّرتوهــــــــا ...
على الضعيف من ساسها قلبتوها ...
في الجو الخبزة عليه طيّرتوها ....
الي استغنى، ربح في مشواره ..
غنيتو البعض و البعض فقـّرتوها ...
ما تخصنا كان نغمة الزماره ...
الغلا راهو كوانـــــــا ...
سيب علينا عسكره و أعوانه ...
اللي نشكوله ما سمع دعوانا ...
من جيهتنا مغمضين أنظاره ...
طبيبنا ما حب يعطي دوانا ...
في عوض المسهل جاب هالزمّاره ...


عبد الرحمان الكافي ( ولد 1885 - و توفي 1934)
(صاحب ملزومة الصبر لله والرجــــــوع لربّي)،
ألّفها سنة 1924