عبدالكريم الخالقي - ثَمَّهْ غِيرَهْ فِيهَا حُبْ...

ثَمَّهْ غِيرَهْ فِيهَا حُبْ
وثمَّهْ غِيرَهْ فِيهَا غلْ
وثَمَّهْ غِيرَهْ فِيهَا خْشَمْ
وثمَّهْ غَيرَهْ فِيهَا ذِلْ
وثَمَّهْ غِيرَهَ كِيفْ الكِذْبَهْ
وثَمَّهْ غِيرَهْ كِالعسَلْ

لكِنْ هِيَ يَا مَوْلاَي
قَالِتْ مَانْغِيرِشْ بِالكُلْ
حتَّى قَلْمِكْ مَا حَيَّرْهَا
وْلاَ فَيَّقْهَا عَزْفْ مْطَرْ
ولاَ عَطْركْ مِنْ حَرْفَكْ فَاحْ
ولاَ شَمْسِكْ فِي وِجْه صْبَاحْ
ولا طَلاَّتِكْ وقْتِ الشِدَّهْ @
ولاَ كَرْتُوشْ ولا تُفَّاحْ

هِيَ قَالِتْ يَا مَوْلاَيْ
أنَا مَا نْغِيرِشْ بِالكُلْ

فْهِمْتِشْ زَعْمَهْ آشْ تْقُولْ؟
زَعْمَهْ تْحِبِّكْ يَا مَهْبُولْ؟
ولاَّ مِن كَثْرِةْ غِيرِتْهَا
قَالِتْ مَا نْغِيرِشْ بِالكُلْ

فِي بَالِي مَا فَمِّشْ صَحْرَا
رْملها مَا يِحْمِلْشِ جْمَلْ
وفِي بَالِي مَا فَمِّشْ رَسْلَهْ
نمْشِي تَرْعَى بْلاَشْ فْحَلْ
وفِي بَالِي مَا فَمِّشْ شَهْدَهْ
وانْتِ مَا تِمْلِكْشِ نْحَلْ

زَعْمَهْ تْحِبِّكْ يَا مَجْنُونْ
والاَّ مَا تْغِيرِشْ بِالكُلْ؟

عبدالكريم الخالقي