الانتخاب تابعوا لحساب - زجل منشور لأول مرة للمرحوم عبد الله الودان

ياك جمعتونا في الزنقة
و خطبتو علينا فلحلقة
و قلتو ختارو هاد لورقة
لي علقتوها بالصقة
قلتوا تعيش قلتوا تبقى
وحلفتي بحلوفك لكبير
حتى تنادي بحق الفقير
وتكون خوة وتكون قريب
وتكون صاحب وتكون حبيب

و شحال هدرتي كتيرة لهدرة
باش حنا ناخدو لعبرة
نتيقو بيك نديروك رقيب
مولانا ومولاك هوى لحسيب
فوق منا عالم الغيب
و انتى القران فصدرك
و فايتنا بتجاريب
تقت أنا وصوت عليك
و قلت كناصرك ونبغيك
و بالنية درت ايدي في ايديك
وعطيتك صوتي تضمن قوتي
و قوت لمساكن خوتي
أخوتي و خوت خوتي
ولا لحكام في ايديك
جري فحياتي أولى موتي
غير سمح ليا نقلول ليك كلمة
المقراطية خصها لخدمة
خصها لملاح و ناس صحاح
تزرع لخير تجني رباح
ناس هدات راسها لشعب
ناوية تضيع و تتعدب
و حالفا ما تفرق هاد الدرب
تجني لخير تجني صلاح
تما العمل يولي كمال
تما الفلاح يولي عاقل
تما العاطل يولي راجل
تما مسكينا يرتاح

المقراطية خصها لخدمة
المقراطية خاصها لحكمة
باش تمحي ديك الضلمة
تمحي الجهالة تمحي لجراح
المقراطية صح و معقول
أللي بغى شي مايقول يقول
كل واحد منا مسؤول
و فعمالو يلقى لجواب
و يعرف باللي لينتخاب
اللي فات لبراح و غاب
راه مازال تابعوا لحساب
ولي دار الدنب يلازموا لعقاب

عبدالله الودان

هذا النص

ملف
عبدالله الودان
المشاهدات
80
آخر تحديث

نصوص في : بلا تصنيف

أعلى